A Xunta avanza nos trámites para a remodelación dos Cantóns por parte do Concello da Coruña

A Coruña, 11 de xuño de 2024

A Xunta avanza nos trámites para a remodelación dos Cantóns, entre a rúa Juana de Vega e  A Marina, por parte do Concello da Coruña.

Así o subliñou hoxe a conselleira de Vivenda e Planificación de Infraestruturas, María Martínez Allegue, que participou na presentación deste proxecto nun acto no Concello presidido pola alcaldesa Inés Rey. Nesta rolda de prensa tamén estivo presente a delegada territorial da Xunta na Coruña, Belén do Campo.

Remarcou que a dimensión deste proxecto que impulsa a Administración local fai posible tramitar con celeridade os informes patrimoniais necesarios para iniciar a actuación nunha zona estratéxica da cidade, ao concentrar gran parte da oferta hostaleira, comercial e de servizos.

Neste sentido, fixo fincapé na relevancia da colaboración entre administracións, particularmente entre as entidades locais e a Xunta. Como exemplo, resaltou o recente acordo político entre o Goberno galego e o Concello da Coruña para definir desde o consenso o futuro da fachada marítima da cidade.

Do marco de consenso entre administracións -Xunta, Concello, Goberno, Adif, Portos do Estado e Autoridade Portuaria- naceu o protocolo 'Coruña Marítima' referendado o 22 de maio para avanzar nos usos portuarios e urbanos, abrir o porto á cidade e garantir a sustentabilidade financeira da Autoridade Portuaria da Coruña.

A conselleira detallou que a Xunta xa ten en marcha unha primeira actuación, consistente na execución da estrutura flotante do Parrote, que supón un investimento de case 3M€. Así, o proxecto foi adxudicado a mediados de xaneiro de 2024 e estará rematado no 2025.

Aposta pola Coruña

Martínez Allegue salientou a aposta pola Coruña que a Xunta está a materializar, con actuacións como o Novo CHUAC. Recordou que se están a desenvolver as obras da 1ª fase, cun investimento de máis de 35M€ e coa previsión de rematalas en 2026. De xeito conxunto, as restantes fases de execución e a mellora dos accesos, mobilizarán un orzamento de máis de 450M€ neste proxecto que reforzará o servizo de sanidade pública na área.

Tamén subliñou a construción de 50 vivendas de promoción pública en Xuxán, cun investimento de máis de 11M€. A Consellería de Vivenda vén de licitar estas obras co obxectivo de telas rematadas no ano 2026.

Trátase do terceiro grupo de vivendas de promoción pública cuxa construción se licita en Xuxán, onde a Xunta xa entregou aos adxudicatarios 40 vivendas. Ademais, están adxudicadas as obras para executar outras 40 neste barrio, que se iniciarán en canto se dispoña da licenza municipal.

Agradeceu ao Concello que vaia levar proximamente este trámite a comisión de goberno para dispoñer axiña desa licenza municipal.

Concluíu que o barrio de Xuxán está sendo urbanizado co financiamento da metade dos custes por parte da Xunta, que é propietaria do 50 % cento do solo, que se destina á construción de 1.100 vivendas protexidas.