A Xunta salienta que case o 60% das persoas atendidas nos polos de emprendemento da provincia de Ourense son mulleres
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- A directora xeral de Promoción da Igualdade, María Quintiana, reivindicou o papel das mulleres que emprenden no rural e chamou a seguir rachando coas fendas de xénero
- A directora xeral de Traballo Autónomo e Economía Social, Marta Mariño, puxo en valor a puxanza do emprendemento feminino e o potencial do rural na creación de novos negocios
Verín (Ourense), 10 de xuño de 2024
A directora xeral de Promoción da Igualdade, María Quintiana, e a directora xeral de Traballo Autónomo e Economía Social, Marta Mariño, clausuraron a xornada O emprendemento feminino como motor do desenvolvemento rural celebrada esta mañá no Polo de Emprendemento e Apoio ao Emprego de Verín.
Na súa intervención, Marta Mariño sinalou que nos Polos da provincia de Ourense -Verín, O Carballiño, Baños de Molgas e O Barco- se atenderon un total de 371 proxectos, e puxo en valor a puxanza do emprendemento feminino, pois o 59% das máis de 330 persoas atendidas neles son mulleres.
Nesta liña, a directora xeral de Traballo Autónomo e Economía Social fixo fincapé no potencial do rural para poñer en marcha novos negocios. Boa mostra disto, sinalou, son os proxectos creados e dirixidos polas mulleres que acudiron aos Polos. Algúns, puntualizou, en sectores tradicionalmente masculinizados.
A directora xeral de Promoción da Igualdade destacou, pola súa banda, que Galicia é unha das comunidades con mellores datos de emprendemento feminino, e reivindicou o papel das mulleres que viven no rural. Con todo, recoñeceu que seguen persistindo diferenzas entre as oportunidades de mulleres e homes e apelou a seguir rompendo estereotipos e fendas de xénero.
Neste sentido, María Quintiana garantiu que a Xunta de Galicia seguirá traballando para que as mulleres ocupen o lugar que sempre deberon ocupar na sociedade e destacou, entre outras iniciativas do Goberno galego, o programa Emega, que apoia a posta en marcha, a mellora e a activación de iniciativas empresariais creadas por mulleres, facendo especial fincapé nos sectores nos que aínda non teñen moita presenza.
Polos de Emprendemento e Apoio ao Emprego da provincia de Ourense
Segundo engadiu a directora xeral de Traballo Autónomo e Economía Social, nos Polos da provincia de Ourense a maioría das iniciativas están vinculadas ao sector servizos, seguidas das de hostalaría e comercio. Coas persoas emprendedoras que se acolleron a esta iniciativa leiro de titorías, máis de 500 de maneira online e preto de 500 de xeito presencial.
No caso do Polo de Verín, Marta Mariño explicou que se puxo en marcha en xullo de 2022 e que foi o primeiro da Rede en entrar en funcionamento. Neste tempo, atendeu máis de 164 proxectos, e entre eles predominan os relacionados co sector servizos, seguidos dos de agricultura e gandería e de hostalaría. Das 140 persoas atendidas neste Polo, máis do 60% son mulleres.
