Lorenzana solicita ao Goberno central que non se repartan fondos dos Perte que permitan a deslocalización das compras en economías emerxentes
Estas imágenes pertenecen a xunta.gal
- Reclama ao Estado que transfira os fondos dos Pertes industriais ás comunidades autónomas ou que deseñe convocatorias de axudas para as auxiliares da automoción que garantan o emprego local
- Lembra que en xuño se convocarán o programa de axudas extraordinarias aprobado pola Xunta para as empresas provedoras da automoción, dotado con 18M€ que e que inclúe dúas liñas de axuda a fondo perdido que oscilan entre os 300.000 e os 700.000 euros
Vigo, 31 de maio de 2024
A conselleira de Economía e Industria, María Jesús Lorenzana, solicitou ao Goberno central que non permita a deslocalización das compras en economías emerxentes a través do reparto dos fondos dos PERTE. Así o manifestou logo do encontro celebrado hoxe co Clúster de Automoción e Mobilidade de Galicia (Ceaga), onde tamén avanzou que a Xunta estuda posibles modificacións no orzamento dos fondos Feder que lle corresponden a Galicia para favorecer a industria galega da automoción.
Neste sentido, a titular de Economía e Industria reclamou ao Goberno central que transfira os fondos dos Pertes ás comunidades autónomas ou que deseñe convocatorias de axudas para as auxiliares da automoción que garantan o emprego local directamente ás empresas. "Temos ben deseñadas as fórmulas porque falamos constantemente co sector", dixo Lorenzana con respecto ás transferencias destes fondos á Administración autonómica. "Eu insto ao Ministerio de Industria a que traballe con nós e transfira estes fondos", afirmou, para apuntar que dos 33.500 M€ dos Pertes industriais o 50 por cento aínda está sen convocar.
De non facer así, proseguiu, a conselleira solicitou que no deseño das convocatorias das axudas para o sector da automoción, sabendo que a industria auxiliar dá emprego a unhas 18.000 persoas, "se teña en conta a redución da pegada de carbono para así poder adxudicar as axudas a quen contrata en local e se manteña o emprego neste caso en Galicia".
Con respecto á posible modificación do orzamento dos fondos Feder que lle corresponden a Galicia, a conselleira apuntou que o obxectivo pasa por prestar o máximo apoio á industria galega da automoción, especialmente, á auxiliar e á de fabricación de compoñentes, coa previsión de contar xa con crédito no ano 2025 e continuar con novas axudas en anos posteriores.
Lorenzana reiterou que a Xunta vai seguir traballando e apoiando a automoción galega para que poida seguir investindo e competindo con outras economías do mundo. E, nesta liña, lembrou que en xuño se convocarán o programa de axudas extraordinarias aprobado pola Xunta para as empresas provedoras do sector, dotado con 18M€ que e que inclúe dúas liñas de axuda a fondo perdido que oscilan entre os 300.000 e os 700.000 euros.