A Xunta dá a coñecer a riqueza ambiental dos parques naturais galegos mediante conexións en directo desde a Feira Internacional Abanca Semana Verde
- Ángeles Vázquez reitera a aposta da Xunta por concienciar á poboación sobre a importancia de protexer e conservar os espazos naturais ao ser fundamentais para a Comunidade tanto desde o punto de vista ambiental como desde o económico e o social
Silleda (Pontevedra), 31 de maio de 2024
A Xunta de Galicia dá a coñecer a riqueza ambiental dos parques naturais galegos mediante conexións en directo desde o expositor que a Consellería de Medio Ambiente e Cambio Climático ten á disposición dos visitantes da Feira Internacional Abanca Semana Verde de Galicia.
De feito, durante a súa visita ao recinto feiral, a conselleira de Medio Ambiente e Cambio Climático, Ángeles Vázquez, acompañou ao alumnado do Colexio Plurilingüe María Inmaculada de Silleda durante a conexión que se realizou co Parque Nacional marítimo-terrestre das Illas Atlánticas de Galicia, na que unha axente ambiental respondeu todas as preguntas e dúbidas da rapazada sobre este espazo protexido.
Segundo explicou Ángeles Vázquez, os visitantes da feira poderán interactuar con persoal dos espazos protexidos de Galicia nas sesións que se levarán a cabo ata o próximo domingo desde as 11,00 h. e ata as 19,30 h. As conexións iranse alternando entre o parque nacional e os seis naturais cos que conta a Comunidade - Baixa Limia-Serra do Xurés, Fragas do Eume, O Invernadeiro, Serra da Enciña da Lastra, Monte Aloia e Complexo dunar de Corrubedo e lagos de Carregal e Vixán- nas sesións que se levarán a cabo ata o próximo domingo desde as 11,00 h e ata as 19,30 h.
A maiores, esta actividade, denominada Galicia, unha natureza de película, tamén inclúe a presentación dunha guía interpretativa dos diferentes espazos protexidos da Comunidade a través de cartelería na que cada parque ten unha referencia cinematográfica.
Ángeles Vázquez enmarcou estas actividades na aposta da Xunta por concienciar á poboación sobre a importancia de protexer e conservar os espazos naturais pois son fundamentais para a comunidade tanto desde o punto de vista ambiental como desde o económico e o social. Deste xeito, a cidadanía pode converterse nun verdadeiro aliado, no presente e no futuro, para o coidado dos valores naturais, da flora e da fauna galegas.
