A Xunta apoia o Desafío Os Ancares a favor da Fundación Española de Enfermidades Priónicas
Estas imágenes pertenecen a xunta.gal
- Uns dez ciclistas lucenses percorrerán o 8 de xuño unha ruta de 215 quilómetros con 6.200 metros de desnivel acumulado polos concellos da Montaña
Lugo, 31 de maio de 2024
A Xunta de Galicia apoia o reto "Desafío Os Ancares", unha ruta ciclista que se propoñen completar varios corredores lucenses o día 8 de xuño para recadar fondos a favor da Fundación Española de Enfermidades Priónicas.
O delegado territorial da Xunta en Lugo, Javier Arias, participou hoxe na presentación do evento na Delegación Territorial xunto cos promotores, Jacobo Carlos Goás e Pablo González. Tamén interveu por videoconferencia Sara González, vicepresidenta da Fundación.
Ambos percorrerán nunha xornada coas súas bicicletas 215 quilómetros con 6.200 metros de desnivel acumulado, polos municipios de Lugo, Becerreá, Navia de Suarna e Cervantes.
A súa intención é dar visibilidade e instar á investigación das doenzas priónicas, que producen un deterioro cognitivo ou condutual de rápida evolución, na maioría dos casos en semanas ou meses. Entre elas figuran a enfermidade de Creutzfeldt-Jakob, a encefalopatía bovina esponxiforme ou o Insomnio Letal.
Con este mesmo obxectivo, os dous ciclistas afeccionados culminaron o pasado ano en catro días o traxecto de 800 quilómetros que separa Irún de Santiago de Compostela polo Camiño Norte.
