Martina Aneiros destaca a implicación de Nervión Naval Offshore no impulso da FP dual en Ferrolterra
Estas imágenes pertenecen a xunta.gal
- Actualmente completan a súa formación académica un total de 44 alumnos de sete programas formativo de FP Dual da zona
- Aneiros pon en valor esta modalidade formativa que permite capacitar ao alumnado segundo ás demandas do mercado laboral
As Somozas (A Coruña), 29 de maio de 2024
A delegada territorial da Xunta en Ferrol, Martina Aneiros, acompañada do director xeral de Nervión Naval Offshore, Roberto Bouzas e do alcalde das Somozas, Juan Alonso Tembrás, visitou esta mañá a planta que empresa ten no municipio onde actualmente completan a súa formación académica 44 alumnos de sete programas de FP Dual de catro centros de Ferrolterra.
Durante a visita, na que tamén estiveron presentes a directora de planta de Nervión As Somozas, Almudena Tojeiro, e a directora do departamento de Persoas de Nervión Naval Offshore, Lisa Castedo, Aneiros tivo a oportunidade de coñecer a evolución da planta, dedicada á produción de compoñentes de eólica mariña, así como a integración dos ciclos de FP Dual postos en marcha este curso pola Consellería de Educación, Ciencia, Universidades e FP en virtude dun convenio de colaboración coa empresa.
A delegada territorial agradeceu a implicación da firma pertencente ao Grupo Amper e a súa colaboración co Goberno galego para seguir impulsado a FP Dual como modelo referencial. Un modelo do que destacou "está avalado por unha taxa de empregabilidade de case o 100% e que dá a oportunidade aos alumnos ingresar no mercado de traballo e ás empresas contar con man de obra cualificada".
Aneiros puxo en valor esta modalidade formativa que permite capacitar ao alumnado segundo ás necesidades do mercado laboral "con perfís diversos adecuados á demanda integral de profesionais que van desde a loxística ata a soldadura ou a mecatrónica", sinalou.
Dos 44 alumnos que se están a formar na planta de Nervión Naval Offshore e cos que a delegada territorial tivo a ocasión de intercambiar impresións acerca desta experiencia formativa e da súa estadía na empresa, 24 proceden do CIFP Ferroltera -20 do ciclo medio de Soldadura e caldeiraría, 2 do ciclo superior de Mecatrónica industrial e outros 2 do ciclo superior de Deseño e fabricación mecánica-, 4 do CIFP Rodolfo Ucha -2 do ciclo superior de Transporte e loxística e outros 2 do de Administración e finanzas-; 2 do ciclo de Mecatrónica industrial do IES Fene, e os 14 restantes do ciclo medio de Soldadura e caldeiraría do IES Plurilingüe Castro da Uz, en As Pontes.