A Xunta abre a convocatoria de axudas a microproxectos de cooperación para o desenvolvemento exterior
- O Diario Oficial de Galicia publica hoxe a orde, dotada con 90.000 euros, dirixida a ONGD e aos outros axentes sociais ou entidades que teñan entre os seus fins a realización de actividades de cooperación para o desenvolvemento
- Financiaranse gastos relacionados con infraestruturas, materiais e de persoal para poñer en marcha a intervención
A Xunta abre a convocatoria de axudas a microproxectos de cooperación para o desenvolvemento no exterior cunha dotación de 90.000 euros, segundo se recolle no Diario Oficial de Galicia de hoxe. A iniciativa está dirixida ás ONGD e a outros axentes sociais ou entidades que teñan entre os seus fins a realización de actividades de cooperación para o desenvolvemento. En ambos os casos, os beneficiarios deben estar inscritos no Rexistro Galego de Axentes de Cooperación para o Desenvolvemento e non ter recibido ningunha subvención nas convocatorias para proxectos de cooperación para o desenvolvemento no exterior nos últimos cinco anos.
Segundo a orde publicada, enténdese por microproxectos aquelas intervencións puntuais, de limitada intensidade, de duración non superior aos 12 meses que teñan por obxecto fortalecer ou complementar outras actuacións levadas a cabo por axentes de cooperación no mesmo territorio. A Xunta financiará ata o 95% do orzamento total de cada iniciativa ata un máximo de 30.000 euros. O período de execución é dun ano, desde o pasado xaneiro ata o 31 de decembro de 2024.
Entre os gastos subvencionables figuran tanto os directos imprescindibles para poñer en marcha e a execución da intervención tales como os custos de aluguer, construción ou reforma de inmobles e infraestruturas necesarios para levar a cabo a iniciativa; equipos informáticos e outro material e equipamento vinculado á actividade; gastos de persoal; servizos técnicos e profesionais; viaxes e aloxamentos; ademais de gastos financeiros, de asesoría xurídica e rexistrais e periciais. Tamén se inclúen os gastos correntes de funcionamento no país onde se execute o microproxecto.
As ONGD e axentes de cooperación inscritos no Rexistro Galego de Axentes de Cooperación para o Desenvolvemento e interesados na medida deberán presentar as solicitudes a través da sede electrónica da Xunta ( https://sede.xunta.gal) no prazo dun mes contado dende mañá.
Cómpre lembrar que a Xunta conta con outra liña de axudas anual para a execución de proxectos de cooperación para o desenvolvemento no exterior promovidos por axentes de cooperación, dotada con 6 millóns de euros e cuxa convocatoria se abriu tamén esta semana.
