O Servizo Galego de Saúde publica as listas provisionais de selección temporal de catro categorías de persoal estatutario
- Xeráronse un total de 23.541 inscricións para as categorías de auxiliar administrativo, persoal de servizos xerais, cociñeiro e pinche
- Resultaron admitidos 22.919 aspirantes
- O 9,92 % foron novas inscricións realizadas despois da data límite de presentación do anterior proceso
Santiago de Compostela, 21 de maio de 2024
O Diario Oficial de Galicia publica, na súa edición de hoxe, a relación provisional coa orde de prelación e a puntuación obtidas polos aspirantes admitidos no proceso de elaboración das listas de selección temporal do Servizo Galego de Saúde das categorías de auxiliar administrativo, persoal de servizos xerais, cociñeiro e pinche.
O total de aspirantes admitidos foi de 22.919 persoas. Por categorías, admitíronse 11.525 aspirantes en grupo auxiliar da función administrativa, 6.912 en persoal de servizos xerais, 3.938 en pinche e 544 en cociñeiro.
O número de novas inscricións en relación ao pasado ciclo é de 1.137 en grupo auxiliar da función administrativa, 881 en persoal de servizos xerais, 257 en pinche e 61 en cociñeiro.
As listas atópanse publicadas, á disposición das persoas interesadas, na páxina web do Sergas, no apartado Emprego Público-Listaxes de contratación persoal estatutario. Ademais, o estado de cada solicitude pode ser consultado polo aspirante no seu expediente electrónico persoal en Fides/expedient-e/sección de procesos.
As persoas interesadas poderán presentar reclamación ante as xerencias das áreas sanitarias e as direccións con competencias na xestión de persoal das entidades adscritas á Consellería de Sanidade no prazo de dez días hábiles, ata o 4 de xuño.
Próximas publicacións
Mañá 22 de maio publicaranse as listas provisionais das categorías de celador, celador (quenda discapacidade intelectual), técnico en farmacia, técnico superior en anatomía patolóxica e citoloxía, técnico superior en dietética, técnico superior en documentación sanitaria, técnico superior en hixiene bucodental, técnico superior en imaxe para o diagnóstico, técnico superior en laboratorio de diagnóstico clínico e técnico superior en radioterapia.
