O Sergas celebrará o domingo 23 de xuño o exame do proceso selectivo para 271 prazas de médico de familia
- Resultaron admitidas 606 persoas neste proceso selectivo por concurso-oposición
- O exame celebrarase na mañá do 23 de xuño no recinto feiral de Silleda
Santiago de Compostela, 16 de maio de 2024
O Servizo Galego de Saúde publicou hoxe na súa páxina web a data de celebración do exame da fase de oposición do proceso selectivo para o acceso a 271 prazas de médico de familia de atención primaria, que terá lugar o domingo 23 de xuño ás 9,30 horas no Recinto Feiral Internacional de Galicia, en Silleda.
No proceso, que se desenvolve polo sistema de concurso-oposición, foron admitidos 606 aspirantes.
A través desta convocatoria, o Sergas oferta 126 prazas de acceso libre, 132 de promoción interna e 13 prazas reservadas a discapacidade xeral.
Estas 271 prazas totais engádense ás 42 prazas ofertadas no proceso selectivo de estabilización, mediante concurso de méritos, proceso que xa foi resolto no pasado mes de xaneiro.
