O Conservatorio de Danza de Lugo inaugura unha exposición sobre os seus 20 anos de traxectoria
- O delegado territorial, Javier Arias, subliñou que se trata dun centro de referencia da Xunta, único en Galicia, con arredor de 250 alumnos e alumnas
Lugo, 2 de maio de 2024.
O Conservatorio Profesional de Danza de Lugo inaugurou hoxe unha exposición que recolle os seus 20 anos de traxectoria. O delegado territorial, Javier Arias, subliñou no acto que se trata do único centro público dependente da Xunta destas características, o que unido á súa contrastada calidade, converteuno en referente dentro e fóra de Galicia, sumando actualmente arredor de 250 alumnas e alumnos.
Un centro que comezaba a súa andaina en outubro de 2003 ofrecendo o grao elemental, ao que se foron engadindo o grao medio na especialidade de Danza Clásica e posteriormente o grao profesional en Danza Contemporánea.
Arias gabou o labor educativo e de dinamizador cultural que exerce na provincia, e lembrou que a Consellería de Educación, Ciencia, Universidades e Formación Profesional traballa no Plan Educ-Arte para reforzar o papel dos centros de ensinanzas artísticas como polo tractor da canteira cultural galega. Tivo especialmente unhas palabras de agradecemento ao alumnado, por esforzo que realizan, moitas veces compatibilizando os seus estudos con outras tarefas.
A mostra reúne imaxes e vídeos que percorren o labor diaria, as clases ou as actividades realizadas polo Conservatorio nestas dúas décadas; permanecerá exposta na Capela de Santa María ata o día 26 de xuño.
A inauguración, na que tamén actuaron os alumnos do último curso de Danza Contemporánea, pon o broche de ouro aos actos organizados esta semana con motivo do Día Internacional da Danza, que se conmemora o 29 de abril. Porén, a celebración do vixésimo aniversario aínda continúa e o Conservatorio prepara xa a gran gala do 28 de xuño, na que invitan a participar a antigos alumnos que están traballando como profesionais, mesmo algúns deles no estranxeiro.
Novas matrículas
O Conservatorio Profesional de Danza de Lugo ten aberto ata o 24 de maio o período de inscrición para as probas de acceso. Oferta 34 prazas no primeiro curso de Grao Elemental -para nenos e nenas a partir de 8 anos- e 30 no primeiro de Grao Profesional, estas distribuídas a partes iguais entre as dúas especialidades de Danza Clásica e Danza Contemporánea.
Igualmente, está aberto o prazo para inscribirse no curso preparatorio, ata esgotar o límite de 40 prazas. Consiste nun curso gratuíto para maiores de 7 anos, que non require proba de acceso e propón o achegamento a esta disciplina de forma lúdica con clases un día á semana.
