A Xunta estará presente na Feira do Libro de Buenos Aires cunha vintena de actividades
Estas imágenes pertenecen a xunta.gal
- Galicia conta cun expositor propio de 44 m2 con máis de 250 publicacións, onde se presentarán as principais novidades das editoriais galegas ata o 12 de maio
- A delegación galega está formada por narradores como Manel Loureiro, ilustradoras como Rebeca Varela 'Perdivel' e Rocío Carbia e tamén poetas, como Luís González Tosar
- A cita na capital da Arxentina é unha das principais paradas do circuíto internacional que recibe cada ano a máis dun millón de lectores e supera a participación de 12.000 profesionais do sector do libro durante as súas case tres semanas de duración
Santiago de Compostela, 27 de maio de 2024
A Xunta de Galicia estará presente na Feira Internacional do Libro de Buenos Aires, que se está a celebrar a súa 48ª edición desde o pasado xoves, 25 de abril e na que participará cunha vintena de actividades e cun expositor propio, no que se darán a coñecer máis de 250 publicacións.
Esta cita é unha das principais paradas do circuíto internacional para promocionar a literatura galega que recibe cada ano máis dun millón de lectores e supera a participación de 12.000 profesionais do sector do libro durante as súas case tres semanas de duración.
Así, no marco desta feira —considerada un dos eventos culturais e editoriais máis importantes de Latinoamérica— a Xunta desenvolverá desde o venres 3 e ata o domingo 12 de maio accións para afondar na difusión da cultura e do libro na capital da Arxentina a través de actividades con obradoiros nos que se adobiará ilustración e música, presentación de libros, contacontos, coloquios e conferencias.
Actividades no expositor de Galicia
Á Feira de Buenos Aires chegará unha delegación formada por profesionais do sector editorial e libreiro, tamén escritoras e escritores xunto con creadores e creadoras procedentes do eido da ilustración. Así, contarase co narrador Manel Loureiro, quen abordará o salto ao audiovisual e outros medios da literatura e participará nun coloquio coa editora Luísa Ortigosa e coa ilustradora Rebeca Varela 'Perdivel', que versará sobre O fío do libro: quen, como, cando e onde.
Ademais Rebeca Varela 'Perdivel' presentará o proxecto Bruxas Pop e protagonizará unha orixinal acción artística na feira, debuxando en directo en presenza de todos e todas aquelas que queiran achegarse para coñecer en vivo como é o proceso creativo da ilustración. Pola súa banda, Rocío Carbia realizará un obradoiro de pintura con música. A Feira do libro de Buenos Aires contará tamén co poeta Luís González Tosar, quen afondará nunha conferencia co escritor e xornalista Antonio Requeni sobre A lingua galega e o lunfardo.