Jorge Atán toma posesión como novo secretario xeral técnico de Medio Rural e José Balseiros repite como director xeral de Gandaría, Agricultura e Industrias Agroalimentarias

Santiago de Compostela, 26 de abril de 2024

A conselleira do Medio Rural, María José Gómez, presidiu esta mañá a toma de posesión do novo secretario xeral técnico da Consellería, Jorge Atán, e do director xeral de Gandaría, Agricultura e Industrias Agroalimentarias, José Balseiros.

Neste acto, que tivo lugar no complexo administrativo de San Caetano, a conselleira destacou a valía e profesionalidade de ambos altos cargos. Pola súa banda, os nomeados agradeceron a confianza depositada neles pola titular da Consellería e reafirmaron o seu compromiso a prol do medio rural galego.

Secretario xeral técnico

Jorge Atán, o novo secretario xeral técnico, substitúe no posto a Joaquín Macho Canales, que vén de ser nomeado secretario xeral técnico da Consellería de Emprego, Comercio e Emigración. Nado en Vigo en 1967, Atán é licenciado en Dereito pola Universidade de Santiago de Compostela e funcionario do Corpo Superior da Administración Xeral da Xunta de Galicia (grupo A1) dende o ano 1993. Ademais, dispón do diploma do curso de Directivos, da Inspección de Servizos da Xunta de Galicia e o Curso Superior de Relacións Laborais, entre outros.

 

Desenvolveu a súa carreira administrativa en diversos postos da Xunta de Galicia; ademais de ser subdelegado do Goberno na Coruña entre 2012 e 2018. Dentro da administración autonómica, xa ocupou o cargo de secretario xeral técnico da Consellería do Medio Rural entre os anos 2009 e 2012. Entre 2019 e 2021, desempeñou o posto do subdirector xeral de Seguridade e Coordinación na Dirección Xeral de Emerxencias e Interior da Vicepresidencia primeira e Consellería de Presidencia, Xustiza e Turismo. Dende febreiro de 2021 ata agora exerceu como secretario xeral técnico e do Patrimonio da Consellería de Facenda e Administración Pública.

 

Director xeral de Gandaría, Agricultura e Industrias Agroalimentarias

Pola súa banda, José Balseiros repite no cargo como director xeral de Gandaría, Agricultura e Industrias Agroalimentarias. Nado en Cerdedo (Pontevedra) en 1961, xa desempeñara este cargo dende outubro de 2018 ata o seu cesamento en xaneiro deste ano por concorrer nas listas do Partido Popular ás eleccións autonómicas.

 

É Diplomado en Lingua Administrativa e Xurídica Galega e técnico informático na especialidade de aplicacións para a Administración Local. A súa experiencia profesional e carreira política estivo sempre moi vinculada ao ámbito municipal, tanto en calidade de empregado público na Delegación Provincial de Estatística en Pontevedra como, posteriormente, no Concello de Cerdedo.

 

Neste municipio pontevedrés exerceu primeiro de tenente de alcalde e logo de rexedor, entre xaneiro de 2005 e outubro de 2016. Posteriormente desempeñou a vicepresidencia do concello de Cerdedo-Cotobade. Foi tamén deputado provincial por Pontevedra na lexislatura 2007-2011 e vicepresidente do Consorcio Galego de Servizos de Igualdade e Benestar, dende xuño de 2006 ata novembro de 2017.

 

Xa como deputado no Parlamento galego, onde accedeu en novembro de 2016, estivo como vogal en diferentes comisións, entre elas a de Agricultura, Alimentación, Gandaría e Montes, sendo tamén membro da Deputación Permanente da Cámara.