Galicia vai solicitar de xeito inmediato o traspaso dos medios materiais e persoais para xestionar a súa costa tralo aval do Tribunal Constitucional
Estas imágenes pertenecen a xunta.gal
- Ángeles Vázquez salienta que a sentenza certifica que a norma galega é plenamente constitucional e que non é necesario reformar o Estatuto de Autonomía para que a comunidade poida exercer as súas competencias sobre o litoral
- A conselleira de Medio Ambiente e Cambio Climático subliña que a resolución xudicial deixa claro que o recurso do Executivo central foi máis político que xurídico e que é unha mostra máis da diferenza de trato respecto a outras autonomías
- A Xunta lembra que o Goberno central non lle deu opción a negociar mentres que avalou artigos das normas de Cataluña e Baleares que eran iguais aos da galega
- O Executivo autonómico lamenta a inquedanza innecesaria que xerou o recurso na cadea mar-industria e subliña que o fallo outorga seguridade xurídica a unhas instalacións que dan emprego a 40.000 persoas e aportan preto do 5% do PIB
Santiago de Compostela, 24 de abril de 2024
A Xunta vai solicitar de xeito inmediato ao Goberno central o traspaso dos medios materiais e persoais para xestionar a súa costa trala sentenza do Tribunal Constitucional que avala a Lei de ordenación e xestión integrada do litoral de Galicia.
A conselleira de Medio Ambiente e Cambio Climático, Ángeles Vázquez, respondeu unha pregunta no pleno do Parlamento sobre esta materia na que salientou que o Alto Tribunal certifica que a norma galega é plenamente constitucional. Ademais, subliñou, confirma o que sempre defendeu a comunidade, que non é necesario reformar o Estatuto de Autonomía para que Galicia poida exercer plenamente as súas lexítimas competencias sobre o litoral.
A representante do Executivo galego destacou que a resolución xudicial deixa claro que o recurso do Goberno central contra a lei foi máis político que xurídico e que a paralización da normativa responde á diferenza de trato con outras comunidades. De feito, lembrou que a Galicia non se lle deu opción a negociar mentres que a Cataluña e a Baleares se lle recoñeceron como constitucionais os artigos recorridos na lei galega.
Neste sentido, Ángeles Vázquez censurou a actuación do Executivo central dando privilexios a unhas comunidades sobre outras -cando deberían ser todas iguais ante a lei- e a inquedanza innecesaria que xeraron as súas decisións no conxunto da cadea mar-industria e de toda a cidadanía.
"Unha pena que se tivese que chegar a este extremo e que quedara tan de manifesto esa diferenza de trato con outras comunidades", aseverou a conselleira de Medio Ambiente e Cambio Climático, que asegurou que a Xunta vai seguir traballando na defensa dos intereses de Galicia, máis aló de intereses partidistas, como fixo desde o principio.
Neste sentido, incidiu en que o Executivo galego non mudou de posición en ningún momento, cousa que si fixeron os socialistas galegos, que inicialmente apoiaban a lei e despois se abstiveron na votación.
Seguridade xurídica
A responsable autonómica felicitouse por unha resolución do Tribunal Constitucional que é unha gran nova para Galicia e para todos os galegos ao dar garantías ás arredor de 1,5 millóns de persoas que viven no litoral e ás empresas que desenvolven a súa actividade económica nel. Supón avalar a xestión por parte da comunidade dos seus máis de 2.500 quilómetros de costa e dar seguridade xurídica a un complexo mar-industria que dá emprego a arredor de 40.000 persoas e xera unha actividade económica de 9.000 millóns de euros anuais, preto do 5% do PIB de Galicia.
Ángeles Vázquez tamén salientou que a sentenza xudicial certifica que, como defendeu Galicia, a lei non vai contra ninguén, defende os intereses lexítimos de Galicia no marco das competencias que lle atribúe o Estatuto de Autonomía desde unha tripla perspectiva ambiental, social e económica.
