Rueda viaxará a Arxentina para apoiar ás empresas pesqueiras galegas e visitar á colectividade no país

Santiago de Compostela, 21 de abril de 2024

O presidente da Xunta, Alfonso Rueda, viaxará a comezos de maio a Arxentina para reencontrarse coa galeguidade ao outro lado do Atlántico e manter encontros cos representantes das empresas pesqueiras galegas que operan no país e tamén doutras locais que manteñen relacións comerciais coa nosa comunidade. Trátase da primeira viaxe ao estranxeiro como titular do Goberno galego nesta lexislatura. 

Así, durante catro días Rueda levará a cabo un periplo por un dos territorios que máis emigrantes galegos recibiu, especialmente no século pasado, e que aínda a día de hoxe segue moi vencellado a Galicia tanto de xeito cultural como empresarialmente. 

O presidente galego ten previsto reunirse coa colectividade e tamén se desprazará ao sur do país para visitar as plantas pesqueiras de varias compañías galegas. Ademais, tamén aproveitará para manter encontros con distintas autoridades locais.

Tras visitar a Arxentina por última vez en outubro de 2022, esta viaxe servirá para trasladarlles a todas estas compañías e aos sectores produtivos en xeral o apoio do Goberno galego, claves na xeración de emprego e riqueza e no papel de embaixadores da economía galega.

Reforzo do compromiso co exterior

Alfonso Rueda aproveitará estas citas para comprometer o apoio da Administración autonómica a todos os galegos residentes no exterior e ás súas necesidades. Así mesmo, lembrará que todos aqueles que desexen voltar a Galicia tamén contarán coa Xunta a través da Estratexia Galicia Retorna, coa que se pretende facilitar a volta de 30.000 persoas ata 2026. 

Do mesmo xeito, destacará que neste novo mandato a Consellería de Emprego será quen acolla o departamento de Emigración para seguir reforzando o papel desta Estratexia e seguir favorecendo o regreso daqueles galegos e descendentes que están fóra e queren volver á súa terra.