O novo volume do Centro de Estudos Galegos do Algarve analiza as consecuencias da teoría das orixes celtas de Galicia
- O secretario xeral de Política Lingüística participa na presentación do libro de María Xesús Lama López
Santiago de Compostela, 5 de abril de 2024
O secretario xeral de Política Lingüística, Valentín García, participou hoxe na presentación do libro Apropiación cultural e contradiscurso histórico. A materia artúrica na literatura galega, da filóloga e profesora María Xesús Lama López. Dividida en dous volumes, a obra fai un seguimento das consecuencias da teoría das orixes celtas de Galicia a través da conexión coa materia artúrica medieval do século XX.
A obra enmárcase na Colección Textos e Estudos, dirixida desde 2017 polos profesores Pedro Alfonso Ferré da Ponte e María Jesús Botana desde o Centro de Estudos Galegos da Universidade do Algarve, que conta co apoio da Xunta de Galicia.
O libro defende a tese de que o desenvolvemento da creación en prosa en Galicia propicia unha mirada cara á prosa da Idade Media e as orixes do xénero novelesco pola conexión coa tradición céltica. Partindo desta teoría, o traballo analiza os textos galegos máis significativos da produción literaria galega do século XX que utilizan os temas e motivos da materia de Bretaña nunha secuencia cronolóxica que pasa por autores como Ramón Cabanillas, Álvaro Cunqueiro e Xosé Luís Méndez Ferrín.
