A Xunta oferta o maior número de prazas de formación sanitaria especializada da historia de Galicia
- O número de prazas ofertadas increméntase en 18 respecto do exercicio anterior, ata acadar os 638 profesionais con titulación universitaria
- A Administración galega financiará integramente a formación destes profesionais, cun investimento anual de 70 millóns
- Galicia oferta o 100% das prazas acreditadas nas especialidades de Medicina Familiar e Comunitaria, Pediatría, Medicina Interna, Psiquiatría, Psicoloxía Clínica ou Enfermería especialista en saúde mental
Santiago de Compostela, 3 de abril de 2024
O Servizo Galego de Saúde ofertará o maior número de prazas de formación sanitaria da historia de Galicia, cun total de 638, destinadas aos profesionais sanitarios con titulación universitaria de Grao/Licenciatura/Diplomatura en Medicina, Farmacia, Enfermería e do ámbito da Psicoloxía, Química, Bioloxía e Física.
Durante o exercicio 2023/2024, a Xunta de Galicia continuará a incrementar o número de prazas ofertadas respecto da convocatoria anterior, ao tempo que consolidará a oferta formativa das especialidades MIR vencelladas á Atención Primaria, así como tamén no que atinxe as especialidades do eido da Saúde Mental.
En concreto, no caso da Medicina Familiar e Comunitaria, durante as últimas catro convocatorias o Executivo galego ofertou a totalidade das prazas acreditadas, rexistrándose un incremento significativo no seu número. Neste senso, se na convocatoria do ano 2006/2007 había un total de 125 prazas acreditadas e 82 ofertadas (65%), neste exercicio serán 207 as prazas acreditadas, ofertándose o 100%.
Así mesmo, compre destacar que no caso das especialidades relacionadas coa Saúde Mental producirase un incremento do 13% no número de prazas respecto do pasado ano, até acadar un total de 52 prazas. Polo miúdo, serán 17 prazas en Psiquiatría (1 máis que en 2023); 1 en Psiquiatría infantil e da adolescencia, 14 de Psicoloxía clínica (1 máis respecto 2023), e 20 do ámbito da Enfermería especializada en Saúde Mental (4 máis que no anterior exercicio).
Cómpre destacar que a presente oferta será financiada de xeito integro con recursos da Administración galega, o que suporá un investimento anual de 70 millóns de euros. Así, na convocatoria 2023/24 tamén se ofertan o 100% das prazas acreditadas nas especialidades de Cirurxía Oral e Maxilofacial, Cirurxía Pediátrica, Cirurxía Estética e Reparadora, Endocrinoloxía e Nutrición, Xeriatría, Inmunoloxía, Neurocirurxía, Neurofisioloxía Clínica, Oncoloxía Radioterápica; Radiodiagnóstico, Radiofísica Hospitalaria; Enfermería do Traballo, Enfermería Pediátrica e Enfermería Xeriátrica.
Nestes días, as sete áreas sanitarias do Servizo Galego de Saúde está a levar a cabo xornadas de portas abertas co conxunto de novos profesionais residentes.
