A Xunta recibe no Obradoiro os participantes do proxecto inclusivo 'Sen límites' que realizaron o Camiño de Santiago
Estas imágenes pertenecen a xunta.gal
- A sexta edición deste programa de sendeirismo e montañismo con persoas do concello murciano de San Javier centrouse na peregrinación polo Camiño Francés desde Sarria
Santiago de Compostela, 2 de abril de 2024
O director de Administración e Relacións coas Asociacións de Amigos do Camiño de Santiago da Sociedade Anónima de Xestión do Plan do Xacobeo, Ildefonso de la Campa, recibiu un grupo de peregrinos con discapacidade do concello murciano de San Javier, encabezados polo seu alcalde, José Miguel Luengo Gallego, dentro do programa inclusivo Sen límites.
Impulsado pola asociación Aidemar e o club Chotacabras, co apoio do concello de San Javier, a Federación de Atletismo da Rexión de Murcia e a Federación de Deportes para Persoas con Discapacidade Intelectual da Rexión de Murcia, a peregrinación realizouse durante os últimos días e o grupo vén de chegar a Santiago de Compostela. Tras experiencias como as subidas ao Mulhacén ou ao Teide, a sexta edición deste proxecto de sendeirismo e montañismo ten como protagonista o Camiño Francés desde Sarria e reforza os valores da ruta xacobea.
Estes peregrinos súmanse ás máis de 13.000 persoas que esta Semana Santa selaron a Compostela, máis de 9.500 delas só nos días festivos entre o Xoves Santo e o Domingo de Pascua. No que vai de ano, máis de 28.200 recolleron a súa acreditación da peregrinación na Oficina do Peregrino, un 66% máis que no mesmo período do ano pasado.
