A Xunta renova parte do parque móbil dos servizos de Patrimonio Natural e Recuperación de Fauna cun investimento de máis de 2,6 millóns de euros
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O contrato permite dotar ao persoal de camionetas estilo pick-up, coches SUV 4x4, furgonetas e vehículos todoterreo para facilitar o seu labor nas zonas forestais ou de difícil acceso nas que adoita desenvolver a súa actividade
- A disposición de medios máis modernos favorece o aforro de combustible, a eficiencia enerxética e a redución de emisións ao medio ambiente
Santiago de Compostela, 28 de marzo de 2024
A Xunta adxudicou por algo máis de 2,6 millóns de euros o contrato para a subministración de 108 vehículos, cos que renova parte do parque móbil adscrito aos servizos provinciais de Patrimonio Natural e dos Centros de Recuperación de Fauna. A incorporación deste centenar de unidades contribuirá a facilitar e optimizar o labor dos profesionais destes departamentos.
O contrato repartiuse en cinco lotes en función do tipo de vehículo requirido, abarcando camionetas estilo pick-up, coches SUV 4x4, furgonetas e todoterreos. A modalidade elixida para a subministración foi o sistema de arrendamento na modalidade de renting, posto que resulta máis rendible e permite aproveitar mellor os recursos públicos ao corresponder ao adxudicatario, tanto o mantemento integral dos vehículos como as reparacións e outros gastos derivados do seu uso.
A súa entrada en servizo permitirá modernizar parte dos medios materiais adscritos á Dirección Xeral de Patrimonio Natural tendo en conta que o seu persoal precisa para o exercicio das súas funcións vehículos deste tipo. De feito, están dotados de tracción integral preparados para transitar por pistas forestais estreitas e outras zonas agrestes ou de difícil acceso, manobrar sen dificultade en terreos embarrados e superar fortes pendentes a baixa velocidade. Así mesmo, os Centros de Recuperación de Fauna requiren de furgonetas lixeiras con separación de carga para a recollida de fauna silvestre.
A adxudicación do contrato -cunha duración de 24 ou 48 meses, en función do tipo de medio- permitirá dispoñer de vehículos máis modernos que os do parque móbil actual, favorecendo un aforro de combustible, cunha maior eficiencia enerxética, e a redución das emisións ao medio, así como facilitando o labor dos profesionais dos servizos de Patrimonio Natural, que disporán de mellores medios para desenvolver o seu traballo en maiores condicións de seguridade.
