Fabiola García traslada o apoio da Xunta de Galicia ás familias numerosas ante o desprezo do Goberno central

Santiago de Compostela, 26 de marzo de 2024

A conselleira de Política Social e Xuventude en funcións, Fabiola García, mantivo esta mañá unha reunión cos presidentes da Asociación Galega de Familias Numerosas (Agafan) e da Federación Española de Familias Numerosas onde lles trasladou o apoio da Xunta de Galicia ante o desprezo do Goberno central na futura Lei de familias. Segundo explicou, esta normativa trata de erradicar o traballo e o consenso social acadado coas familias numerosas ao longo dos anos ao eliminar o concepto do texto.

Fabiola García denunciou que o Goberno central non tivo en conta ás Comunidades Autónomas na elaboración desta normativa, pese a que invade competencias autonómicas. Así, lamentou que a Xunta teña que coñecer polos medios de comunicación o seu contido e non se teña en conta a súa opinión, pese a incorrer en erros como  obviar a un colectivo tan importante como o das familias numerosas.

A conselleira en funcións destacou que se trata dunha lei ideolóxica e decepcionante o non cumprir coas principais promesas realizadas polo Goberno central neste ámbito. Neste sentido, sinalou que chama a atención o anuncio da gratuidade das escolas infantís só para as familias monoparentais e só durante catro meses. Unha medida que xa se vén aplicando en Galicia desde hai dous cursos para todas as familias e durante toda a etapa de 0 a 3 anos. Ademais, sinalou que non parece que este anuncio vaia traer aparellados máis recursos xa que en 2024 o Goberno central ten renunciado a presentar Orzamentos Xerais do Estado.

Apoio ás familias numerosas

Pola súa banda, lembrou que o Goberno galego segue apoiando a todas as familias galegas, sexan da tipoloxía que sexan. En canto ás familias numerosas, apoia o seu proxecto con medidas como unha nova dedución fiscal no IRPF para as familias con dous ou máis fillos, que beneficiará tamén ás familias numerosas galegas xa na declaración da renda deste ano. A Xunta tamén as axuda na súa carga burocrática a través do novo título dixital que teñen a súa disposición na aplicación Xunta_Eu e que, ademais, agora estará vixente ata os 26 anos do fillo menor, o que evitará milleiros de renovacións de títulos cada ano.