A Xunta incorporará a vacina vía intranasal para os cativos de dous a cinco anos na vindeira campaña antigripal
Estas imágenes pertenecen a xunta.gal
- Rueda resalta que se van destinar máis de 550.000 € a adquirir 30.000 doses
- Salienta que entre as "vantaxes" desta vacina é que non implica pinchazo xa que é un aerosol nasal
- Entre os seus beneficios está aumentar a protección fronte á gripe xa que neutraliza o virus na porta de entrada, a mucosa nasal, e, por outro lado, diminuír a incidencia de infeccións por estreptococo A
- Asegura que o obxectivo é lograr que "máis do 60%" dos rapaces desta franxa de idade estean protexidos fronte a gripe
Santiago de Compostela, 21 de marzo de 2024
O presidente da Xunta en funcións, Alfonso Rueda, anunciou hoxe que Galicia vai incorporar "a vacina intranasal para os cativos de 2 a 5 anos" na vindeira campaña de vacinación contra a gripe. "Vanse destinar máis de 550.000 euros a adquirir 30.000 doses", indicou tras a reunión semanal do Consello.
Rueda resaltou que Galicia "é un referente en vacinación, especialmente na infantil" xa que foi a primeira a nivel mundial en incorporar certas vacinas ao calendario. Nesta liña, asegurou que a Xunta segue a ampliar a prevención de enfermidades coa incorporación desta nova vacina para os rapaces de 24 a 59 meses.
Esta vacina é un aerosol nasal que presenta vantaxes sobre a vacina convencional entre as que cómpre remarcar unha técnica de administración menos invasiva, "xa que substitúe os pinchazos". Así se recolle, segundo trasladou o presidente, nun informe da Dirección Xeral de Saúde Pública da Consellería de Sanidade referido á contratación da subministración sucesiva desta vacina.
O departamento sanitario galego agarda que a efectividade e o impacto en saúde pública sexa maior, posto que, ao ser unha vacina atenuada, activa o sistema inmunitario a nivel local. Así, aumenta a neutralización do virus na porta de entrada, na mucosa nasal.
Ademais, recentes estudos demostraron a diminución da incidencia de infeccións por estreptococo A en cativos que recibiron a vacina intranasal fronte á gripe.
O obxectivo, tal e como salientou Rueda, é "acadar coberturas de vacinación por riba do 60%" nos nenos e nenas deses tramos de idade, o que se estima en máis de 27.000 persoas. Na última campaña de 2023-2024, Galicia acadou un 50 % de cobertura na franxa de 24 a 59 meses.
Por tanto, a adquisición desta vacina por parte da Xunta responde ao obxectivo de mellorar a protección da poboación infantil fronte á gripe, así como a adherencia e as coberturas nas idades comprendidas entre os 24 e 59 meses, que son os tramos onde descenden os datos de vacinación. En cambio, a cobertura en bebés de 6 meses a un ano chega ao 83 %.
Cómpre remarcar que Galicia foi pioneira en anunciar a vacinación antigripal en nenos de 6 a 59 meses na campaña 2022-2023, conseguindo a cobertura máis alta entre as comunidades que a introduciron no calendario. A vacina dispoñible para este grupo de idade nestas dúas temporadas 22/23 e 23/24 foi a tretravalente de administración intramuscular mediante inxección.
