A Xunta apoiou a formación para o emprego de máis de 94.000 persoas nos dous últimos anos cun investimento que superou os 223 millóns de euros

Oleiros (A Coruña), 20 de marzo de 2024

A directora xeral de Formación para o Emprego e Orientación, Zeltia Lado, interveu hoxe na apertura en Oleiros (A Coruña) da Feira de Emprego Young Talent, onde puxo en valor a importancia da formación para o emprego para axustar a oferta á demanda de traballo e dar saída ás vacantes que actualmente existen no mercado laboral, máis de 12.000.

Lado expuxo que, entre outras actuacións, a Xunta está a deseñar programas de formación en colaboración co tecido produtivo para cualificar as persoas que buscan un emprego nas actividades económicas nas que existen vacantes.

Así, entre 2022 e 2023, máis de 94.000 persoas participaron en accións formativas xestionadas pola Consellería de Promoción do Emprego e Igualdade para o que se destinaron máis de 223 millóns de euros. Ao abeiro desta oferta formativa abárcanse diferentes tipoloxías de accións, como aquelas conducentes á obtención de certificados profesionais ou outras nas que existe un compromiso de contratación por parte das empresas ou entidades que imparten a formación.

Lado, así mesmo, salientou o éxito da formación que se está a impartir a través dos convenios de colaboración que a Xunta mantén cos clústeres e entidades máis representativas dos principais sectores produtivos. Nestas accións formativas deseñadas polo propio tecido empresarial tomaron parte desde a súa implementación no ano 2022 máis de 34.500 alumnas e alumnos.

Para casar oferta con demanda, a directora xeral tamén lembrou que a Xunta está a modernizar o Servizo Público de Emprego de Galicia para que a Administración autonómica poida coñecer de primeira man e, en tempo real, as demandas de persoal que precisa o tecido produtivo e brindar novas oportunidades ás persoas que buscan traballo.

Salientou, ademais, a aposta do Goberno galego polo emprego xuvenil, recordando que en 2023 puxéronse en marcha diferentes programas para impulsar a formación e o traballo entre a mocidade con 27 millóns de euros, o que permitiu beneficiar 1.900 mozas e mozos.

Galicia acadou nos últimos meses cifras históricas á baixa de desemprego xuvenil, desde que hai rexistros (2006). A máis recente (febreiro 24): 14.669 desempregados menores de 30 anos. O número de ocupados menores de 30 aumentou, ademais, no último ano en 13.400 persoas (11,5%), fronte ao 7,1% que creceu no Estado (EPA 4º trimestre do 2023).