A Xunta promove o emprendemento feminino con recursos e axudas á conciliación e a iniciativas empresariais do rural
- A secretaria xeral da Igualdade, Sandra Vázquez, participou hoxe en Cambados no II 'Foro O Salnés Emprende con M', organizado polo Centro de Información á Muller (CIM) da comarca do Salnés
- Referiuse ao programa Emega, que cumpre 28 anos de traxectoria, co que se aposta polo emprego feminino
- Sinalou que desde os Polos de emprendemento dáse un pulo a centos de mulleres, ao tempo que se fomenta a economía social do rural
- Puxo en valor a rede de Centros de Información á Muller (CIM) para axudar ás mulleres galegas desde diferentes ámbitos co foco posto nas vítimas de violencia machista
Cambados (Pontevedra), 14 de marzo de 2024
A secretaria xeral da Igualdade, Sandra Vázquez, destacou hoxe na súa intervención no II Foro O Salnés Emprende con M, organizado polo Centro de Información á Muller (CIM) da comarca arousana, o apoio da Xunta ao emprendemento feminino para desenvolver un tecido económico local sólido, igualitario e competitivo. Vázquez avogou polo desenvolvemento pleno de todas as mulleres galegas e, así, referiuse a diversos programas de axudas e recursos que a Consellería de Promoción do Emprego e Igualdade pon á súa disposición como Emega, con 28 anos xa de traxectoria, que apoia o emprendemento e o emprego feminino e a conciliación.
A secretaria xeral da Igualdade tamén puxo en valor os Polos cos que se dá un pulo ao emprendemento en xeral e tamén a centos de mulleres fomentando, ademais, a economía social do rural.
A Consellería de Promoción do Emprego e Igualdade aposta, así mesmo, polo asociacionismo con liñas de axudas para crear sinerxías e redes de apoio entre mulleres "para conseguir unha igualdade real entre todos os colectivos, idades, procedencias e profesións".
Para rematar, Vázquez apuntou que a Xunta seguirá tamén reforzando a rede de Centros de Información á Muller (CIM) co que se ofrecen recursos e ferramentas para dar sevizo, informar e axudar ás mulleres galegas co foco posto nas vítimas de violencia de xénero.
