A nova Unidade PET/TAC do Complexo Hospitalario Universitario de Ourense inicia a súa actividade asistencial
- A Xunta de Galicia investiu 5,7 M€ na obra e nos equipos da nova área de medicina nuclear do CHUO na que está instalada esta unidade
- O equipo comezou esta semana a atender pacientes tras acadar a certificación do Consello de Seguridade Nuclear e completar a formación do seu persoal
- As novas instalacións evitarán o traslado de pacientes a Vigo para unhas probas que foron solicitadas para máis de 1.600 pacientes ourensáns o ano pasado
- A solicitude de licenza ao concello vai acompañada da demanda de bonificación do 95 % no imposto sobre construcións, instalacións e obras (ICIO), tal e como fora acordado no convenio entre Xunta e concello
Ourense, 14 de marzo de 2024
A Unidade PET/TAC do Complexo Hospitalario de Ourense (CHOU) comezou xa a atención dos primeiros pacientes, unha vez completada a fase de autorizacións e permisos por parte do Consello de Seguridade Nuclear (CSN), que comprobou todos os requisitos en materia de protección radiolóxica que son esixidos a esta instalación, para garantir a súa seguridade e a dos traballadores e pacientes.
Co obxectivo de acadar as máximas prestacións asistenciais e estándares de calidade, o persoal da Unidade vén de recibir formación especializada no coñecemento do equipo, características técnicas e todas as posibilidades diagnósticas que ofrecerá para a Área Sanitaria de Ourense.
Eficiencia
Esta unidade integra probas diagnósticas PET (Tomografía por Emisión de Positrones) e TAC (Tomografía Axial Computarizada), o que permite reducir visitas hospitalarias, e diminuír tanto os niveis de radiación que recibe o paciente como os tempos de espera.
Asemade, a decisión do goberno galego de instalar esta tecnoloxía en Ourense evitará os desprazamentos dos pacientes a outras áreas sanitarias, nunha contorna con demanda á alza destas probas, solicitadas para un total de 1.625 pacientes desta área sanitario durante o ano 2023.
Os novos equipos realizan estudos diagnósticos oncolóxicos, tanto no diagnóstico inicial como no proceso de seguimento ou monitorización da resposta ás terapias aplicadas, presentando a vantaxe de ser híbrido, dotados dunha imaxe funcional (PET) e estrutural (TAC), o que posibilita un diagnóstico precoz dos procesos tumorais, na maioría carcinomas de pulmón, cancros hematolóxicos e de próstata.
O equipo PET/TAC tamén pode realizar un diagnóstico de procesos oncolóxicos pediátricos, e de todo tipo de procesos inflamatorios/infecciosos, como en febres de orixe descoñecida, complicacións con próteses vasculares o cardíacas ou doenzas inmunolóxicas.
Diagnóstico por imaxe de alta precisión
A integración PET/TAC supón unha auténtica revolución na práctica clínica, mellorando a calidade asistencial e detallando o diagnóstico ao máximo para deseñar terapias máis axeitadas e eficaces, no eido da oncoloxía, e procesos inflamatorios.
A tomografía por emisión de positróns ou PET emprega materiais radioactivos en cantidades moi pequenas chamadas radiotrazadores ou radiofármacos, e unha cámara e un ordenador de última xeración analizan os resultados e ofrecen un diagnóstico de máxima precisión capaz de identificar a nivel celular os cambios no corpo, polo que pode detectar nun estado temperá a aparición dunha doenza, moito antes do que poida detectar calquera outro exame por imaxe.
Ambas probas complementarias realízanse de forma simultánea e significan un extraordinario avance no diagnóstico e tratamento, entre outros nun proceso tumoral.
Nova área de medicina nuclear dentro da reforma integral do CHUO
A chegada da tecnoloxía PET ao Hospital de Ourense requiriu do deseño e construción dunha nova área de Medicina Nuclear para este centro hospitalario. Esta obra finalizou xa os espazos do PET e continuará neste ano coa área na que se instalarán as dúas gammacámaras adquiridas tamén pola Xunta este ano e que están instaladas de xeito provisional na planta baixa do edificio Santa María Nai.
Polo tanto, a Xunta de Galicia complementou os fondos europeos Next Generation que permitiron adquirir o PET (1,5 millóns) e as dúas gammacámaras (1,4 millóns) coa execución dunha obra que ascende ata os 2,8 millóns de euros. Así, unha vez rematadas as obras e a instalación destes equipos, a Xunta terá investido 5,7 millóns de euros neste novo servizo de Medicina Nuclear.
Este investimento para a nova área de medicina nuclear insírese nos 80 millóns de euros investidos durante a presente lexislatura pola Xunta de Galicia en actuacións de reforma integral e ampliación do Complexo Hospitalario Universitario de Ourense,
Así, o goberno galego non só instalou este PET e outros equipos tecnolóxicos de alta gama senón que está a rematar tamén a obra da nova UCI e continuando a construción do novo edificio de hospitalización e materno-infantil ao tempo que ten o compromiso de licitar este ano as reformas das áreas de cardioloxía e radioloxía intervencionistas, nas que terán a súa localización definitiva os equipos de hemodinámica e neurorradioloxía adquiridos o ano pasado a través de fondos europeos Next Generation.
