A Xunta acusa ao Goberno central de facer unha "fuxida cara adiante" e de non asumir as consecuencias da "chapuza" da dragaxe da ría do Burgo
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O Goberno galego remitiu unha carta á Secretaría de Estado de Medio Ambiente a finais de xaneiro reclamando o abono das compensacións aos profesionais afectados pola obra sen recibir resposta algunha ata hoxe
- Tamén acusa ao Executivo estatal de "agocharse' e non "dar a cara" ao non participar nas reunións a tres bandas confraría- Estado- Xunta para non ofrecer explicacións dos motivos polos que non asume a responsabilidade como promotor da actuación
- O informe elaborado pola asistencia técnica da confraría sinala numerosas deficiencias na execución da obra que sinala que 24 dos 27 bancos marisqueiros quedaron en peor estado respecto ao inicio dos traballos
- Tamén denuncian o "flagrante" incumprimento da declaración de impacto ambiental da obra publicado no BOE o 27 de setembro do 2017 que sinala o cese da actividade marisqueira alcanza ata que os bivalvos acaden talla comercial
A Coruña, 11 de abril de 2025
A Consellería do Mar acusa á Secretaría de Estado de Medio Ambiente de facer unha "fuxida cara adiante" e de non asumir as consecuencias da "chapuza" da dragaxe da ría do Burgo. Recorda o departamento autonómico que a finais de xaneiro foi remitida unha carta instando ao Ministerio de Transición Ecolóxica e Reto Demográfico (Miteco) a aboar as compensacións económicas ás persoas mariscadoras que viron detida a súa actividade a consecuencia desta actuación ata que os bivalvos acaden tamaño comercial e sexa posible retomar a actividade marisqueira na zona. A misiva a día de hoxe aínda non obtivo resposta.
Así o manifestou a directora xeral de Desenvolvemento Pesqueiro, Marta Villaverde, no encontro celebrado hoxe con representantes da confraría que, unha vez máis, non contou con ningún representante do Ministerio. Unha actitude que afeou a representante autonómica e que, dixo, reflicte o nulo interese e absoluta falta de sensibilidade cunha situación que afecta a 70 familias. Así, acusou ao Goberno central de "agocharse" e "non dar a cara" para non ter que dar explicacións sobre a "chapuza" da dragaxe, chea de deficiencias, así como dos motivos polos que non asume a súa "responsabilidade exclusiva" como promotores da actuación.
Nesta liña, Villaverde recordou que o informe elaborado pola asistencia técnica da confraría enumera numerosos erros e incumprimentos na execución dos traballos que deixaron como resultado que 24 dos 27 bancos marisqueiros presenten hoxe un peor estado do que tiñan antes do inicio das obras. Concretamente se indica que todas as zonas de marisqueo a flote foron afectadas así como 20 dos 23 bancos de marisqueo a pé.
Entre as deficiencias se enumerou a redución das superficies produtivas, variacións na batimetría, modificacións das características granulométricas así como a presenza de irregularidades no terreo causadas pola maquinaria pesada cuxa orixe está no remate inadecuado ou incompleto dos traballos. Unha situación que compromete gravemente o futuro da actividade marisqueira na zona e que deixan ás persoas mariscadoras nunha situación de gran "incerteza".
A directora xeral reiterou o apoio ás demandas dos profesionais que exixen a corrección destas deficiencias na execución do proxecto e o abono de compensacións económicas ata que sexa posible retomar a actividade como sinala a propia declaración de impacto ambiental da obra. Un documento publicado no BOE o 27 de setembro do 2017 que sinala que o cese da actividade marisqueira inclúe o período que transcorre desde que finalizan as obras ata que os bivalvos sementados acaden tamaño comercial. Aspecto que, denuncian, estase a incumprir de xeito "fragrante".
A representante autonómica subliñou que a situación actual non é froito de actuacións de rexeneración da ría (limpeza, traslado o sementado) senón que a causa da paralización da actividade marisqueira é unha dragaxe, "que nada ten que ver co anterior". Ademais, recalcou que o cese da actividade abarca ata que o bivalvo poda ser extraído con talla comercial, "algo que non parecen comprender en Madrid". Así, acusou ao o Goberno central de actuar "de mala fe" e de procurar eludir os seus compromisos como promotor destas obras tratando "de xeito irresponsable e utilizando ás persoas mariscadoras como dano colateral" que sexa a Administración autonómica quen asuma as consecuencias duns traballos que "executaron outros".
