A Xunta impulsa en Madrid a divulgación da técnica tradicional da pasamanería aplicada á moda

Santiago de Compostela, 2 de xaneiro de 2025

A Fundación Artesanía de Galicia patrocinou en Madrid, entre os meses de setembro e decembro, un ciclo de obradoiros de divulgación de oficios téxtiles impartidos por profesionais de Artesanía de Galicia en colaboración coa marca de roupa artesanal Carmen 17. A iniciativa vén de pecharse con dous cursos sobre a técnica tradicional da pasamanería impartidos por Zeltia Rodríguez Sedes, titular do obradoiro Zeltia ao aire.

Na quenda de mañá, o curso estivo dedicado á aplicación do bordado ao aire para elaborar xoiería téxtil con cristal checo, mentres na de tarde falouse sobre a pasamanería tradicional do traxe tradicional galego. Cómpre sinalar que Zeltia ao aire é unha marca de complementos que busca recuperar a técnica tradicional do bordado ao aire, descontextualizalo e desvinculalo do noso folclore para convertela en protagonista de xoias e aderezos únicos e actuais.

No marco desta iniciativa, realizáronse dous cursos de reparación de prendas de roupa a través do bordado, que estiveron impartidos por Io Morales, de Io Obradoiro Téxtil, no mes de setembro; dous cursos de bordado tridimensional, a cargo de Minia Banet, de Studio Variopinto, en outubro; e un curso de estampaxe e outro de Furoshiki, impartidos por Xiana Cobo, no mes de novembro.

A través deste tipo de actividades, preténdese dar a coñecer técnicas e oficios relacionados coa artesanía téxtil, achegar a sociedade aos valores do produto feito á man e visibilizar a marca Artesanía de Galicia.

Carmen 17

Carmen17 é un taller que compaxina o deseño de vestiario para artes escénicas coa súa marca de roupa artesanal, fundado en Madrid por Sofía Nieto, licenciada en Escenografía na RESAD, e Arancha Rodrigálvarez, licenciada en Matemáticas e Moda en Central Saint Martins. É tamén un proxecto cultural arredor do téxtil no que se reivindica o papel das mulleres costureiras, do grande patrimonio cultural que supoñen os labores e o valor simbólico que posúe este oficio, que é unha linguaxe e que xera arte. 

Finalistas dos Premios Nacionais de Artesanía 2022 e 2023, unha das súas liñas de deseño baséase na investigación etnográfica. Baixo o paraugas Jacaranda desenvolven as mans, a memoria e as identidades culturais diversas.