O Concello de Caldas de Reis adquire novo equipo en bancada para labores de limpeza e desatascos grazas ao Fondo de Compensación Ambiental da Xunta

Caldas de Reis (Pontevedra), 2 de xaneiro de 2025

O delegado territorial da Xunta en Pontevedra, Agustín Reguera, visitou esta mañá o concello de Caldas de Reis, que adquiriu un novo equipo en bancada con depósito de 2.000 litros para realizar traballos de limpeza e desatasco grazas á liña competitiva do Fondo de Compensación Ambiental (FCA).

O concello contou cunha achega de preto de 29.000 euros que permitiu a adquisición desta maquinaria coa que pretenden prestar servizos relacionados coa protección do ambiente e do espazo natural. Ademais, o concello recibiu unha segunda achega de preto de 7.000 a través da liña non competitiva deste fondo para a adquisición de equipamento para a recollida de residuos.

Neste sentido, Reguera destacou a "importancia de seguir colaborando entre institucións para manter unha contorna limpa, saudable e agradable para todos os galegos e galegas".

A liña competitiva do FCA contou cun orzamento de máis de 400.000 euros na área territorial de Pontevedra, dos que se beneficiaron 11 concellos, ademais das mancomunidades do Salnés e do Morrazo, mentres que a non competitiva alcanzou a 15 concellos e contou cun orzamento de 475.000 euros.

Cabe destacar que, dende o ano 2010, o concello Caldas de Reis recibiu achegas por valor de máis de 126.000 euros a través das dúas liñas deste Fondo de Compensación Ambiental.

FCA

O FCA foi creado para distribuír o canon eólico en beneficio da conservación e restauración da contorna, así como do reequilibrio territorial. As accións subvencionables inclúen os investimentos e custos de funcionamento dos servizos municipais dedicados á protección do medio.

Entre os obxectivos que deben perseguir figuran a conservación da biodiversidade, o fomento do coñecemento e da utilización recreativa e didáctica dos recursos naturais, e a recuperación do medio natural degradado ou contaminado. Tamén deben impulsar a eficiencia e o uso sustentable das enerxías renovables, e, en xeral a protección do medio natural.