As unidades móbiles de resonancia magnética do Servizo Galego de Saúde, referencia para a comunidade radiolóxica internacional

Santiago de Compostela, 21 de decembro de 2024 As unidades móbiles de resonancia magnética do Servizo Galego de Saúde espertaron o interese da comunidade médico-científica internacional, en Chicago, no Congreso da Sociedade Norteamericana de Radioloxía, o evento máis importante deste ámbito a nivel mundial.

A xefa de servizo de Diagnóstico por Imaxe de Galaria, empresa pública de servizos sanitarios, a doutora Mercedes Arias, foi a encargada de expoñer as vantaxes deste modelo, pioneiro e único na actualidade no sistema público de saúde de España. A doutora Arias destacou que as unidades móbiles, que lle dan servizo aos hospitais comarcais de toda Galicia, "garanten a plena equidade e accesibilidade a todos os pacientes".

Galaria, que leva participando case de maneira ininterrompida desde hai 30 anos nesta cita de referencia que reúne a máis de 52.000 profesionais de todo o mundo, subliñou a exportabilidade do modelo galego da unidade móbil de resonancia magnética.

Máis de 45.000 especialistas participantes no encontro foron testemuñas dos logros do funcionamento das resonancias móbiles de Galicia.

De maneira pioneira, o Servizo Galego de Saúde facilita o acceso a estas probas aos pacientes que viven lonxe dos grandes centros hospitalarios.

Destaca, ademais, o compromiso medioambiental do servizo coa redución da emisión de  CO₂, preto de 5.000 toneladas durante 18 anos, ao evitar os desprazamentos de ida e volta dos pacientes aos seus hospitais de referencia, máis de 32 millóns de quilómetros. Así mesmo, o servizo reduce de maneira moi significativa a posibilidade de sufrir un sinistro de tráfico ou a perda de horas de traballo.

Modelo único na sanidade pública, accesible e sustentable

Desde o ano 2006, o Servizo Galego de Saúde conta cun servizo de tele-radioloxía grazas á unidade móbil de diagnóstico por imaxe, un modelo de atención sanitaria único no sistema público español. A presenza destas unidades móbiles nos centros comarcais, que levan realizadas máis de 200.000 probas, evita desprazamentos innecesarios.

Durante os últimos dous anos, o Servizo Galego de Saúde renovou os equipos das unidades móbiles, incorporando avances que permiten obter imaxes de maior calidade cun tempo menor e pasando dun habitáculo de 60 a 70 cm de diámetro, mellorando así o confort dos pacientes. Esta renovación ofrécelle unha tecnoloxía aos pacientes dos hospitais comarcais nas mesmas condicións que usuarios que teñen como centro de referencia hospitais máis grandes.

Tecnoloxía responsable co medio

Pola súa parte, a xefa do servizo de consultoría de Galaria, Cristina Enjamio, subliñou neste foro internacional a importancia da sustentabilidade tecnolóxica da xestión sanitaria. Así, asegurou que "a modernización da tecnoloxía de diagnóstico por imaxe nos sistemas sanitarios debe incluír criterios de sustentabilidade, tendo en conta o impacto ambiental e os custos ao longo do ciclo de vida dos equipos, non só do investimento".

A publicación defendida no encontro aborda a clave de integrar a sustentabilidade na planificación e adquisición de tecnoloxía, garantindo o seu cumprimento e promovendo un financiamento responsable. Este enfoque estratéxico busca mellorar a eficiencia e reducir o impacto ambiental nos servizos sanitarios e, en particular, no ámbito do diagnóstico por imaxe.

Efectividade da resonancia magnética no cancro de endometrio

O congreso de Chicago tamén contou coa presentación do traballo do doutor Alfonso Iglesias, da unidade diagnóstico por imaxe de Galaria, que describe os cambios incorporados na nova clasificación da Federación Internacional de Xinecoloxía e Obstetricia en imaxes de resonancia magnética, e nel inclúense múltiples recomendacións de utilidade para estadificar correctamente o tumor con resonancia magnética. Con isto conséguese unha maior exactitude na planificación precirúrxica, o cal posibilita o tratamento máis adecuado para cada paciente.

A correcta estadiaxe do tumor con resonancia magnética permite definir con claridade o seu tamaño, localización, extensión local a distancia (metástase), asegurando unha óptima estratexia terapéutica.

En España, o cancro de endometrio é a cuarta neoplasia máis frecuente en mulleres, cunha mortalidade de 2.2 casos/100.000 mulleres ao ano. A media de idade do diagnóstico é de 63 anos, pero máis do 90 % dos casos diagnostícanse en mulleres menores de 50 anos.