A Xunta anima ao sector gandeiro a solicitar xa as axudas para a adquisición de cans, pastores eléctricos e valados móbiles para previr os ataques do lobo

Maceda (Ourense), 13 de decembro de 2024

A conselleira de Medio Ambiente e Cambio Climático, Ángeles Vázquez, animou hoxe ao sector gandeiro a solicitar xa as axudas para a adquisición e mantemento de cans protectores do gando, pastores eléctricos e valados móbiles de malla electrificada para previr os ataques do lobo.

Durante a súa visita a unha explotación gandeira na localidade ourensá de Maceda, Ángeles Vázquez lembrou que esta mesma semana se abriu a convocatoria dunha liña de axudas para implantar medidas preventivas fronte a fauna silvestre, cun orzamento de 1,54 millóns de euros e que inclúe tamén investimentos fronte ao oso ou o xabaril.

Logo de lembrar que os interesados teñen un mes de prazo para solicitar estes apoios, a conselleira detallou as contías máximas ás que poden optar. Así, no caso do lobo, poderán ser de ata 300 euros por can defensor e protector do gando e 200 euros por exemplar para a súa manutención (cun máximo de 3 cans); ata 3 pastores eléctricos, cun límite de 600 euros por explotación, e ata 8 mallas electrificadas e 800 euros.

Cómpre lembrar que, no caso das medidas de prevención por ataques de lobo, estas axudas van dirixidas a propietarios de gando vacún, ovino, cabrún, equino e porcino inscritos no Rexistro de explotacións gandeiras (REGA).

A maiores, Ángeles Vázquez avanzou que nos vindeiros días, logo das correspondentes publicacións no Diario Oficial de Galicia, se abrirá o prazo para solicitar outras dúas liñas de incentivos para medidas preventivas. Serán as destinadas a financiar a instalación de valados fixos e a contratación de persoas coidadoras do gando, cuxo importe ascende a preto de 1 millón de euros, polo que en 2025 o Goberno galego destinará un total de 2,52 millóns de euros a apoiar ao sector agrogandeiro para implantar medidas de prevención antes os ataques de lobo, oso e xabaril.

Deste xeito, tal e como incidiu a conselleira, a Xunta mantén o seu compromiso de apoiar ao sector gandeiro ante os ataques que sofre por parte da fauna silvestre porque, ademais das axudas para prevención, tamén reserva 3,05 millóns de euros para paliar os danos causados por estas especies. Máis polo miúdo, no caso do lobo destinaranse 910.000 euros; para indemnizar as perdas ocasionadas polo xabaril haberá 2,02 millóns de euros, e para os danos do oso, outros 120.000 euros.

Polo tanto, o Goberno galego destinará en 2025 preto de 5,6 millóns de euros co fin de previr e paliar os ataques protagonizados pola fauna silvestre para garantir a súa convivencia coas actividades do medio rural.

Nivel de protección

Durante a súa visita a conselleira reiterou a necesidade de que o Goberno central rectifique a súa decisión de incluír o lobo na Listaxe de especies silvestres en réxime de protección especial (Lesrpe) porque non responde a criterios obxectivos nin ao seu estado favorable ao norte do río Douro.

Tal e como subliñou Ángeles Vázquez, os datos do censo elaborado pola Xunta estiman que a poboación desta especie se mantén estable na Comunidade con arredor de 93 mandas, polo que o Goberno galego considera que o estado do lobo non é desfavorable. Ademais, desde a súa inclusión na Lesrpe, en setembro de 2021, os avisos por ataques pasaron de 1.204 a 2.074, segundo os datos provisionais de 2024.

Ante isto, e logo de que o Comité do Convenio de Berna aprobase o cambio do status internacional do lobo en Europa de estritamente protexido a protexido, a Xunta insiste en solicitar ao Ministerio para a Transición Ecolóxica e o Reto Demográfico que revise o nivel de protección desta especie silvestre co fin de adaptalo á realidade actual en cada zona e que autorice algunha medida excepcional para facilitar a súa xestión.