Galicia sitúase á vangarda no desenvolvemento da carreira profesional do persoal de xustiza fronte á inactividade do Goberno central
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- José Tronchoni lamentou que o Ministerio de Xustiza siga sen negociar nin regular na materia
- Ademais, a comunidade galega é a única que establece un complemento destinado a retribuír a progresión alcanzada polas persoas funcionarias, ao que destina 6M€
Santiago de Compostela, 2 de outubro de 2024
O director xeral de Xustiza, José Tronchoni, interveu hoxe no Parlamento de Galicia para abordar o resultado dos acordos coas organizacións sindicais sobre as condicións de traballo do persoal funcionario da Administración de Xustiza. Na comparecencia, José Tronchoni situou Galicia á vangarda no desenvolvemento da carreira profesional para estes empregados públicos fronte á inactividade do Goberno central, que segue sen negociar nin regular na materia.
Así, ante a falta da regulación estatal da carreira profesional por Real Decreto, a Xunta chegou a un acordo coas forzas sindicais representadas na mesa sectorial de Xustiza para o desenvolvemento do sistema transitorio de recoñecemento da progresión na traxectoria profesional do persoal ao servizo da Administración de Xustiza en Galicia. Froito deste pacto realizáronse xa convocatorias dos graos I e II da traxectoria profesional e estase a traballar no chamamento do grao III, así como no futuro desenvolvemento da traxectoria profesional con carácter ordinario.
Segundo sinalou o director xeral, Galicia é a única comunidade que establece un complemento de carreira profesional destinado a retribuír a progresión alcanzada pola persoa funcionaria dentro do sistema de carreira horizontal para os letrados da Administración de Xustiza e para o resto do funcionariado. Faise en aplicación da reforma da Lei de Ordenación do Poder Xudicial, realizada en 2018 e que o Ministerio segue sen cumprir.
Ante esta falta de avances no Estado, "en Galicia configúrase un sistema transitorio que permita retribuír o persoal ao servizo da Administración de Xustiza en condicións similares ás dos empregados públicos da Xunta", apuntou. O Goberno galego destina a esta medida a contía de seis millóns de euros, que medrará en 2025 coa nova convocatoria do grao III.
Avances en todas as materias acordadas
José Tronchoni referiuse tamén aos avances noutros dos acordos alcanzados na negociación coas forzas sindicais para a mellora das condicións laborais, como o incremento retributivo de determinación autonómica, que fai que o persoal de Xustiza en Galicia teña unha retribución superior á media nacional; a ampliación dos supostos de incapacidade temporal transitoria nos que se percibe o 100% das retribucións; ou á articulación dunha compensación económica que retribúa a diferenza do soldo do persoa que realice a substitución nun corpo superior.
A estes súmanse a consolidación de prazas de reforzo de máis de tres anos de duración; a creación dun cento de prazas no marco do plan de modificación dos cadros de persoal aprobados no ano 2012; as melloras nos xulgados con competencias en materia de violencia sobre a muller, cun complemento retributivo e aumento do cadro de persoal; e a ampliación dos permisos de maternidade e paternidade, entre outros acordos cumpridos. O obxectivo é seguir a avanzar no desenvolvemento da traxectoria profesional, co compromiso firme da Xunta de Galicia con este persoal.
