A Xunta mellora a seguridade e accesibilidade de máis dun milleiro de paradas de autobús cun investimento de 35,5 M€
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- O conselleiro de Presidencia, Xustiza e Deportes, Diego Calvo, visitou un destes puntos no concello de Arteixo
- Preto de 300 están en execución ou rematadas e máis de 700, en tramitación ou proxecto
Arteixo (A Coruña), 2 de outubro de 2024
O conselleiro de Presidencia, Xustiza e Deportes, Diego Calvo, xunto co director da Axencia Galega de Infraestruturas, Francisco Menéndez, e a directora xeral de Mobilidade, Judit Fontela, visitou hoxe en Arteixo as paradas de autobús de Lañas, onde fixo balance do Plan de mellora da seguridade accesibilidade de paradas de autobús. A través desta iniciativa, dotada con 35,5 millóns de euros, vaise actuar en máis dun milleiro de puntos de espera en toda Galicia. Deste total, preto de 300 están en execución ou rematadas e máis de 700 en tramitación ou proxecto.
Concretamente nos concellos das rutas de acceso polo oeste á cidade da Coruña, na que se integra Arteixo xunto coa Coruña, Carballo, Cerceda, Culleredo, Malpica e Ponteceso, o programa de melloras inclúe preto de 60 paradas que supoñen un investimento de 1,4 millóns de euros. Segundo explicou o conselleiro, as actuacións en cada unha delas permiten mellorar a accesibilidade e a conectividade.
Para conseguilo, acondiciónase o itinerario peonil, dótase dunha zona de parada adecuada ao autobús e adaptada ás normativas de accesibilidade ao transporte público, e colócanse marcas viarias. A maiores, instálase unha marquesiña accesible para o resgardo dos peóns durante a espera.
Diego Calvo enmarcou a iniciativa na aposta da Xunta por fomentar entre a poboación galega o uso do transporte público, ao que se destinan cada ano 140 millóns de euros. Este esforzo orzamentario permite ofrecerlles ás persoas usuarias diferentes vantaxes, como o sistema tarifario único e bonificado ou as tarxetas Xente Nova e +65, con ata 60 viaxes de balde ao mes para menores de 21 anos e maiores de 65.
"Trátase así de reducir o uso do vehículo privado e fomentar unha mobilidade máis sostible e menos contaminante", apuntou. Nesta liña, referiuse a outras das accións impulsadas pola Xunta, como son a intermodalidade e os aparcadoiros disuasorios que se están a habilitar na contorna de grandes cidades e de vías de alta capacidade.
