A Xunta lanza unha campaña de farmacovixilancia para impulsar a colaboración da cidadanía na identificación de efectos adversos dos medicamentos
Resumen autogenerado por OpenAI
Audios generados (reproducción automática)
Los audios se reproducen de forma automática uno detrás de otro. Haz clic en el icono para descargar el audio o aumentar/disminuir la velocidad de reproducción.
Debido al tamaño del artículo, la generación del audio puede tardar unos segundos y es posible que se generen varios audios para un mismo artículo.
- Divulgaranse vídeos e infografías en centros de saúde e oficinas de farmacia para que a cidadanía coñeza como proceder para notificarlle á Administración unha reacción adversa a un fármaco
- A farmacovixilancia encárgase de identificar, cuantificar, avaliar e previr os riscos derivados do uso dos medicamentos autorizados
- Derivado da pandemia da covid-19, no ano 2021 houbo unha sensibilización especial con estas notificacións de reaccións adversas, incrementándose nun 269 %
Santiago de Compostela, 17 de agosto de 2024
A Subdirección Xeral de Farmacia do Servizo Galego de Saúde vén de pór en marcha a iniciativa Coa túa colaboración os medicamentos poden ser máis seguros, unha nova campaña informativa que, impulsada polo Centro de Farmacovixilancia de Galicia en colaboración coa Escola de Saúde para os Cidadáns, ten por obxecto fomentar a colaboración da poboación na notificación de posibles efectos adversos nos medicamentos.
A campaña será difundida en centros de saúde e oficinas de farmacia con diferentes vídeos informativos e infografías que procuran facilitar como se debe proceder no caso de sospeitar dunha reacción adversa nun medicamento.
A web www.notificaram.es contén o formulario para trasladar unha notificación deste tipo á Administración sanitaria. Búscase tamén mellorar a calidade das notificacións que recibe a Administración sobre os fármacos comercializados na comunidade galega.
As principais funcións da Farmacovixilancia son identificar, cuantificar, avaliar e previr os riscos derivados do uso dos medicamentos autorizados. Ademais, o seu principal obxectivo é detectar reaccións adversas e interaccións descoñecidas. Un medicamento comercialízase establecendo unha relación beneficio/risco axeitado.
Non obstante, para coñecer o perfil de seguridade dun medicamento é preciso facer un seguimento continuo e coidadoso durante toda a súa vida. Isto permite identificar os efectos adversos non detectados ata ese momento, minimizar os riscos asociados ao seu uso, e garantir a seguridade dos pacientes.
Con esta iniciativa, o Centro de Farmacovixilancia do Servizo Galego de Saúde busca implicar á cidadanía e aos profesionais sanitarios na mellora da seguridade dos medicamentos.
No ano 2021, derivado da pandemia da covid-19, houbo unha sensibilización especial coas notificacións de reaccións adversas aos medicamentos, incrementándose un 269% o número de notificacións, respecto do ano anterior.
En 2023, acadouse un número de notificacións semellante ás rexistradas antes da pandemia, polo que estas notificacións axudan a mellorar a seguridade dos medicamentos.
